Ezr 4 | NdeIBE | STEP | Kwathi lapho izitha zakoJuda lakoBhenjamini sezizwile ukuthi ababeyizithunjwa basebesakha ithempeli likaJehova, uNkulunkulu ka-Israyeli

Ezra 4

Ukulwiswa Kanye Lokwakhiwa kweThempeli

1 Kwathi lapho izitha zakoJuda lakoBhenjamini sezizwile ukuthi ababeyizithunjwa basebesakha ithempeli likaJehova, uNkulunkulu ka-Israyeli 2 beza kuZerubhabheli lakulabo ababeyizinhloko zezimuli bathi, “Yekelani silincedise ukwakha ngokuba lathi, njengani, siyamdinga uNkulunkulu wenu njalo kukade sisenza imihlatshelo kuye kusukela esikhathini sika-Esarihadoni inkosi yase-Asiriya, onguye owasiletha lapha.”

3 Kodwa uZerubhabheli, loJeshuwa labo bonke ababeyizinhloko zezimuli zako-Israyeli baphendula bathi, “Kalilani lakho ukwakhisana lathi ithempeli likaNkulunkulu wethu. Thina sodwa sizalakha, silakhela uJehova, uNkulunkulu wako-Israyeli, njengokulaywa kwethu nguKhurosi, inkosi yasePhesiya.”

4 Kwasekusithi abantu balelolizwe baqalisa ukubanqunda abantu bakoJuda babenza besaba ukuqhubeka besakha. 5 Bathenga abacebisi bokudunga umsebenzi bawunyampise ngaso sonke isikhathi sokubusa kukaKhurosi inkosi yasePhesiya kwazekwaba sekubuseni kukaDariyu inkosi yasePhesiya.

Ukulwisana Kwamuva Ngezinsuku Zika-Ekisekisi lo-Athakisekisi

6 Ekuqaleni kokubusa kuka-Ekisekisi bethesa abantu bako-Juda labaseJerusalema icala.

7 Njalo kwathi ngezinsuku zika-Athakisekisi inkosi yasePhesiya uBhishilamu, loMithiredathi loThabheli labo bonke abangane babo baloba incwadi isiya ku-Athakisekisi. Incwadi leyo yayibhalwe ngolimi lwesi-Aramu ngendlela yokuloba kwawo ama-Aramu yaphinde yahunyutshwa.

8 URehuni umlawuli webutho loShimishayi unobhala babhala incwadi isiya ku-Athakisekisi inkosi besola iJerusalema besithi:

9 URehuni umlawuli webutho loShimishayi unobhala kanye labo bonke abahlangene labo – abehluleli lezinduna zabantu abasuka eThripholi, ePhesiya, e-Ereki leBhabhiloni lama-Elami aseSusa, 10 kanye labanye abantu inkosi enkulu ehloniphekayo u-Ashuribhaniphali (u-Osinaphari) yabadingisa yayabahlalisa edolobheni laseSamariya lakwezinye izindawo ngaphetsheya kweYufrathe.

11 (Nanka amazwi encwadi leyo abayibhalayo). Kuyo iNkosi u-Athakisekisi, Ivela ezincekwini zakho, abantu abangaphetsheya kweYufrathe:

12 Inkosi ifanele yazi ukuthi amaJuda afikayo kithi lapha evela kuwe aseye eJerusalema njalo sebelakha kutsha idolobho lelo elihlamukayo, elibi kakhulu. Sebevusa imiduli bevuselela lezisekelo.

13 Phezu kwalokho inkosi kufanele ukuba yazi ukuthi aluba idolobho leli lingaze lakhiwe lemiduli yalo imiswe njalo, kakusayikubhadalwa imithelo lenkongozelo yenkosi, lomthetho wokungenisa izimpahla ezweni, besekusithi-ke isikhwama senkosi sisilele izimali.

14 Pho njengoba thina silomlandu ophuma esigodlweni njalo kungafanelanga ukuthi sibone inkosi idelelwa, sithumela umbiko lo ukuyazisa inkosi, 15 ukuze kuchwayisiswe ezincwadini zezindaba ezatshiywa yilabo abakwandulelayo. Kulezozincwadi uzakufumana ukuthi idolobho leli lidolobho lokuhlamuka, lilohlupho emakhosini lakwezinye izigaba zombuso, liyindawo yokuhlamuka kulokhu kwanini. Yilokho okwabangela ukubhidlizwa kwalelidolobho. 16 Inkosi siyazisela ukuthi aluba idolobho leli lingakhiwa, imiswe njalo imiduli yalo, izakube ingasasalanga lalutho ngaphetsheya kweYufrathe.

17 Inkosi yathumela impendulo le: KuRehuni umlawuli wempi loShimishayi unobhala labo bonke abaphathisana labo abahlala eSamariya lakwezinye izindawo ngaphetsheya kweYufrathe: Ngiyalibingelela.

18 Incwadi elasithumela yona isibaliwe yahunyutshwa phambi kwami. 19 Ngakhupha ilizwi kwaphenywa, kwafunyanwa ukuthi idolobho leli lilembali ende eyokuvukela amakhosi, liyindawo yokuhlamuka lokuxhwala. 20 IJerusalema isike yaba lamakhosi alamandla ayebusa kulo lonke elangaphetsheya kweYufrathe, kubhadalwa kuwo imithelo, inkongozelo yenkosi lemithelo yokungenisa izimpahla elizweni. 21 Manje-ke khuphani umlayo kulawomadoda ukuthi kabamise umsebenzi, ukuze idolobho leli lingakhiwa ngize ngitsho mina. 22 Nanzelelani ukuthi lingayilibali indaba le. Kuyekelelwani indaba le ikhula yona ilimaza izifiso zenkosi?

23 Incwadi yeNkosi u-Athakisekisi yonela ukubalelwa uRehuni loShimishayi unobhala lalabo ababephathisa bahle bahamba masinyane kubaJuda eJerusalema bababamba ngamandla ukumisa umsebenzi.

24 Kanjalo umsebenzi wendlu kaNkulunkulu eJerusalema wema kwaze kwaba ngumnyaka wesibili wokubusa kukaDariyu inkosi yasePhesiya.